1
ശതകോടി വിഭാകര കാന്തിമതേ
ശബരീഗിരി വാഴുമകം പൊരുളേ
ശരണപ്രിയ, ദേവ, ദയാനിധിയേ
ശനിദോഷമകറ്റി വരം തരണേ
2
തരുശാഖ നിറഞ്ഞ കൊടുംവനവും
കരിനാഗമിഴഞ്ഞുലയും മനവും
ഒരുപോലെ നയിച്ചു നിറഞ്ഞരുളും
നിറവേ നിധിയേ നിലയേകിടണേ
3
കലികാല കരാള കരങ്ങളെഴും
ഇഹലോക മഹാദുരിതങ്ങളിലും
അഹമെന്നുമൊഴിഞ്ഞമൃതം നിറയാൻ
പരമേശ,കൃപാകര, നീ ശരണം
4
ശബരീശ, മഹേശ, മഹാമയനേ
പരിപാലയമാം മകരദ്യുതിയേ
ശരണം തിരുനാമ പദാവലികൾ
തവസന്നിധി തേടുമുപാസനകൾ
5
കൊടുകാനനമാണഖിലം നിറയേ
നരി, നാഗ, വരാഹ, ഗണങ്ങളുമേ
ഗിരിതന്നിലിരുന്നരുളും കനിവേ
തവ സന്നിധിയാണടിയന്നഭയം
6
പുഴു,പക്ഷി, പരാദ,ചരങ്ങളിലും
ഗജവീര, മൃഗേന്ദ്ര, മൃഗങ്ങളിലും
കുടികൊണ്ടരുളുന്ന മഹാശയനേ
കുറതീർത്തു തരും ജഗദീശ്വരനേ
7
മദമോഹമതാദികളാലുഴലും
മനതാരിലെ വൻപുലിയേറിയിനി
മഹിഷീവധമാടുക ചിന്മയനേ
മണിമണ്ഡപ ജീവസമാധിതനേ
8
പരനേ പരമാത്മ പരാത്പരനേ
പതിനെട്ടു പടിക്കുര ചെയ്തവനേ
അതു കേറിവരുന്ന നരർക്കരുളായ്,
“അതു നീ ” പൊരുളായി നിറഞ്ഞവനേ

അനീഷ് തകടിയിൽ